الثلاثاء، 14 سبتمبر 2010

على اِسم مصر - صلاح جاهين

على اِسم مـصــر - صلاح جاهين
ـــــــــــــــــــــــــــــــــــــــــــــــــــــــــــــــــــــ

على اسم مـصــر التاريخ يقدر يقول ما شاء
وأنا مـصــر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة ف حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مـصــر

مـصــر النسيم في الليالي وبياعين الفل
ومرايه بهتانة ع القهوة - أزورها - واطل

القى النديم طل من مطرح منا طليت

والقاها برواز معلق عندنا في البيت
فيه القمر مصطفى كامل حبيب الكل

الــمـصــري باشا بشواربه اللي ما عرفوا الذل

و مـصــر فوق في الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مـصــر

مـصــر السما الفزدقي وعصافير معدية

والقلة مملية على الشباك - مندية
والجد قاعد مربع يقرا في الجرنال

الكاتب الـمـصــري ذاته مندمج في مقال
و مـصــر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال

على اسم مـصــر
النخل في العالي والنيل ماشي طوالي

معكوسة فيه الصـور - مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد

وزي باقي العبيد باجري على عيالي
باجري وخطوي وئيد من تقل أحمالي
محنيه قامتي - وهامتي كأن فيها حديد
وعينيا رمل العريش فيها وملح رشيد

لكني بافتحها زي اللي اتولد من جديد
على اسم مـصــر